އުވިދިޔަ ރައްޔިތުންގެ މަޖިލީހުގައި ގއ. އަތޮޅުގެ މެމްބަރުކަން ކުރެއްވި އަބުދުﷲ ޖާބިރު ވެރިކަން ކުރާ އެމްޑީޕީއަށް ސޮއި ކުރައްވައިފި. ތިރީސް އަހަރުގެ ވެރިކަން ނިމުމަކަށް ގެނައުމަށް އިއްތިހާދުވި ޖުމްހޫރީ ޕާޓީގެ ނައިބް ލީޑަރުގެ މަގާމުގައި ހުންނެވި ޖާބިރު އެމްޑީޕީއަށް ސޮއިކުރެއްވީ މި ރޭގެވަގުތެއްގައި. މި ސަރުކާރުގެ ފުރަތަމަ
ބަންޑާރަ ނައިބް ކަމުގައި ހުންނެވި ފާތުމަތު ދިޔާނާ ސައީދުގެ ފިރިކަލުން ޖާބިރު އެމްޑީޕީއަށް ސޮއިކުރެއްވިކަން ޖާބިރުވެސްވަނީ މިރޭ ކަށަވަރު ކޮށްދެއްވާފަ. ކުރީގެ ސަރުކާރުގައި މިފްކޯގެ ޗެއާރމަންކަން ކުރެއްވި ޖާބިރު އެމްޑީޕީއަށް ސޮއި ކުރެއްވީ ރިޔާސީ ކޮމިޝަނުން އޭނާއާ ގުޅުން ހުރި މައްސަލަތަކެއް ބެލިކަމުގެ ވާހަކަތަކެއް މީޑީޔާގައި ފެތުރިފައިވަނިކޮށް.
ޖާބިރުގެ އިތުރުން ރައްޔިތުން މަޖިލީހުގެ އިތުރު މެންބަރުންގެ ގްރޫލެއްވެސް އެމްޑީޕީއާއި އިއްތިހާދު ވުމަށް ނުވަތަ ގުޅިވަޑައިގެންނެވުމުގެ މަސައްކަތްތަކެއް ހިނގަމުންދާ ކަމަށްވެސް ދިމިނިވަންނަށް މައުލޫމާތު ލިބިފައި ވެއެވެ.
