ހަބީބް ބޭންކްގެ ކަންޓްރީ މެނޭޖަރ ދިރިއުޅެމުންދާ ގެއަށް ބަޔަކު މީހުން ވަދެ ތޫނުއެއްޗަކުން ހަމަލާދީ ބައެއް ތަކެތި ފޭރިގެންފި.
ފުލުހުން މަޢުލޫމާތުދޭ ގޮތުގައި މިއަދު ހަވީރު ފަސްގަޑި ތިރީސް ހާއިރު ހިނގި މި ހާދިސާގައި ތޫނު އެއްޗަކުން ހަމަލާދީ ޒަޚަމްކޮށްލާފައިވަނީ އުމުރުން ފަންސާސް ހަ އަހަރުގެ ޕާކިސްތާނު މީހެއް. އަދި ހަމަލާދިން މީހުންވަނީ އޭނާގެ ބައެއް ތަކެއްޗާއި ފައިސާ ފޭރިގަނެގެން ފިލާފަ ކަމަށް ފުލުހުން މަޢުލޫމާތުދޭ.
ދިޓީވީއަށް މަޢުލޫމާތު ލިބިފައިވާ ގޮތުގައި، ހަބީބް ބޭންކުގެ ކަންޓްރީ މެނޭޖަރ ގެއަށް ވަން ވަގުތު ބަޔަކު އޭނާ އެޕާޓްމަންޓަށް ވައްދާ، ކަޓަރުން ހަމަލާދީ ބަނުމަށްފަހު އޭނާގެ ލެޕްޓޮޕާއި ކްރެޑިޓް ކާޑު އަދި ފައިސާތައް ހިފައިގެން އެޕާޓްމަންޓް ބޭރުން ތަޅުލުމަށްފަހު ފިލީކަމަށް.
އޭނާ ޒަޚަމް ކޮށްލާފައި ވަނިކޮށް ފެނުނީ އެވަގުތު ބޭރުން އައިސް ގެއަށް ވަން އެގޭގައި ގެންގުޅޭ އަންހެން މީހާއަށް ކަމަށް މަޢުލޫމާތު ލިބިފައިވޭ. މިހާދިސާގައި ޒަޚަމްވި ހަބީބް ބޭންކުގެ ކަންޓްރީ މެނޭޖަރަށް އޭޑީކޭ ހޮސްޕިޓަލުން މިހާރު ދަނީ ފަރުވާ ދެމުން.











